Piykny letni dziyń mioł sie ku końcowi.Klara pomalutku chowała sie za las a stada cilipów slatywały sie nad stow co by w sitowiu bezpiecznie przeczekać noc.Bociek z zaskrońcym w dziubie
zlecioł z nod łonk i karmił wygłodniałe pisklynta kere śmiysznie nodstowiały dziuby.
Przed chałupom na ławce siedziały baby i klachały.Staro Pyrdolino narzekała,że okropnie
żgo jom w boku,że nogi ji puchnom i czsami jak jom łapnie to nie umi zrobić kroku a żyć cza.
Ciynżkie je życie samotnej baby.Berta narzykała na swojego Richarda kery ostatnimi czasy zaniedbuje gospodarstwo a i jom tyż zaniedbuje a przecarz ona je baba poczebujonco.Umicie se to forsztelować,że on zamiast legnońć wele nij woli lotać na jakeś zebrania kaj godajom o polokach,nimcach,żydach.Padom wom nie umia skapować co mu potej palicy łazi.Piykno Kinga siedziała
na boku i wolała sie nie odzywać.Co tu godaćZdowało ji sie,że w końcu znalazła porządnego karlusa
że jakoś ułoży se życie a tu mocie a tu mocie,Albin naszoł go jak figlowoł z gospodyniom Bertom
kerej widać jedyn chłop nie wystarczy.Niech se tam baby narzykajom a ona wiy swoje,biydnom babom
wiater zawsze zawiywo pod spódnica.
Swobodno godka przerwoł Albin kery przykuśtykoł znod stowu i przinius mamulce szykowno ryba kero
łapnoł na hok zrobiony ze zicherki.
-Dziwejcie sie jako szykowno wajska,pedziała Berta.To mosz na jutro obiod.Widza co Albin wyrasto na szykownego synka,cza by go zaprzońc do jakeś porzytecznej roboty.
-Móg by paść gyńsi niepewnie wtronciyła Pyrdolino.
-To nie je gupie przytakła Berta,moich je dziesiyńć a wy tysz mocie szykowne stadko.Co na to Kinga?Zamyślono piykno Kinga kiwła potakujonco głowom i sprawa była zaklepano.
W taki sposób Albin zostoł gynsiopasym.Z poczontku zdowało sie,że to bydzie fajno zabawa
ale chnetka sie okozało,że z gynsiami niy ma szpasu.Po pirsze uznoł,że gynsi to som wieczne
hajoki.Sztyjc sie wadzom i robiom taki butel,że idzie ogupnońć.Po drugie to umiom lotać i jak
kerej piźnie do dekla to podrywo cołke stado kere leci hań daleko a ty tyczysz ani synk w desce.Roz sie zdarzyło,że jego gynsi spotkały sie z gynsiami od starej Ogonki.Zrobiyła sie tako haja a taki wrzask,że biydok straciył głowa.Co biydok na goniył na kuśtykoł co by swoje stado
zrzynońć do kupy wiy jyno on i Pon Buczek.
Zmynczony blank złonaczony siedzioł na łonce i kombinowoł jak by te przejynte gynsi ucapić co by
roz na zawsze odeszła im chyńć na robiynie takej haji.Kombinowoł i wykombinowoł.Na łone wele
niego pasły sie kozy od Sztuchlikowej,były uwionzane na łańcuchach i był porzondek.Żodno ciga
choć by jom nie wiym jak swyndziało nie umiała uciyc.Jak cigi umiom sie paść na łańcuchu to gynsi tysz,uznoł.W doma zejrzoł,że Richard chłop od Berty czymie w szufladzie z byfyha szpula
szpagatu kero mu służyła do szycio opratów abo chomonta.Richard poszoł do miasta a Berta klachała z Pyrdolinom i Albin wpod do kuchni od Berty otwar szuflada odcion szykowny kawał szpagaty i jak by nigdy nic poszoł za stodoła.Usiod se na geplu pocion szpagat na równe czynści
i czekoł na nostympny dziyń.
Brak komentarzy:
Prześlij komentarz