Na drugi dziyń zdowało sie,że wszystko gro.Albin wyżynoł gynsi jak zwykle jyno za stodołom
kożdo gynś została uwionzano za szłapa.I tak gynsi od Berty były na jednym hoku a gynsi od
Pyrdoliny na drugim hoku.Hoki wbiył do ziymi i zadowolony polecioł nod rzyka dziwać sie jak
furgajom ważki,jak pływajom kijonki na koniec zaczon ciepać plaskatymi kamiyniami o woda i liczył
wiela razy sie odbijom.Z zabawy wyrwoł go wrzask jaki podniosły gynsi.Dziwo sie a tyn nojwiynkszy
gęsior macho skrzydłami i dowo sygnał do odlotu.Śmigoł na jednej nodze co by złapać gęsiora za
łeb ale było za późno.Wszystkie gynsi machały skrzydłami i co kero próbowała sie poderwać zaroz
praskła o ziym bo przecarz szpagat czymoł wszystkie za szłapy.Dziepiyro zrobiyło sie larmo w lufcie pełno piyrzo gynsi po plontane leżały jedna na drugiej i wrzeszczały.Piyrszo przileciała
staro Pyrdolino zafuczło ani staro ajzenbana.Stoła na tych swoich obajnach i nie umiała skapować
co sie richtik stało.Gynsi poplontane w lufcie pełno piyrzo larmo take ani by kery otworzył
dźwiyrze do piekła.Za chwilka przileciała Berta wlazła miyndzy gynsi,chciała je rozgonić ale
zamiast tego sama sie zaplontała.
-Wyglondo na to,że gynsi dostały krymfy abo bezkurcyjo utopek robi se błozna.Podźcie sam Pyrdolino
i pomóżcie mnie rozplontać z tego bajzlu bo za chwilka praskna miyndzy pile i byda stracono.
Pyrdolino pomalutku zaczła sie tymu przyglondać i wroz jom oświyciło.
-Przecarz te gynsi som powionzanw szpagatym.Przeecarz jo cie nie wyłonacza z tego bajzlu bo tukej potrza noża abo nożyczek.Ty Berta podziwej sie przecarz ni ma Albina.Kaj je Albin?
-Zaroz zaroz pedziała Berta przecarz to je szpagat od Richarda.Jo tego pierońskigo małego podciepa zabija.O tyn szpagat Richard wczora zrobiył haja.
-Godej wyraźnie o co sie rozłazi,pedziała Pyrdolino.
-O co sie rozłazi,o to,że wczora Richard uznoł,że ze szuflady z byfyju keryś mu sfinoł szpula
szpagatu.A kto mo dostymp do szuflady w byfyju-jo.To jo kradna we własnym miyszkaniu bo przecarz
jo je po polokach-powstańcach a Lećcie on je richtik wielki ślońzok bo on je za nimcami.Jyno on wiy co to prowdziwy ordnug.Prziniyście Pyrdolino noża i uwolnicie mnie bo za chwila dostana pypcia ze złości.Ta "psizatruto potwora,tyn mały gizd,jak on to zrobiył,kiedy,skond wiedzioł
kaj Richard czymie szpagat.Bez tego małego chachara mało co a by my sie poprali.Jak dopadna tego
małego kurdupla to mu szłapy ukryca wele samej rzici.
cdn
Brak komentarzy:
Prześlij komentarz