Sląsko Poezyjo

Jezus Maryjo [dok.gotowe]poz.151
--------------------------------


Czy możecie dać wiara,że mie opyntała
naszo ślońsko gwara,
wlazła za kapota festek sie mie trzymie
nie myśli popuścić ani w lato ani w zimie.

Swojskie strofy godki kejsik używane
wrocajom jak echo zwrotym downo zapomnianym.
-zmiel reż na żarnach,
-z dziyżki wyjmij nociastek
-hań na łonce za miedzom
kaj śpiywo skowronek,łojciec ścino faszyna
zaniyś mu szwaczyna.

Jezus i Maryja!dyć to prawiom starka
kerzy downo pomarli
kerzy isto w orszaku boskim maszyrujom
ale sztyjc mie majom na oku
widać feste wachujom,
co bych bez ta godka zapewniył
im trwanie,przecarz oni som dlo mie
jak te ślońskie godanie.

Wiym,że oni by chcieli bych ta prosto godka
ubroł w szumne szaty sztuki,
bo przecarz starka tom godkom rzykała
tom godkom pszoła tom godkom śpiywała.

Dyć Jezus i Maryja co to łodymie chcecie
bych z noszego ślońskigo gworzynio
zrobiył artystyczno mecyjo.

Hej coś mi sie starko zdowo,
że se siedzicie na niebiońskiej orbicie
i jak kejsik błozna zymie robicie.
Hej widza,że cosik ostro patrzycie,
isto byda musioł sie zaprzeć,dłożyć
dużo chcynio
co by ta naszo godka-skarbnica
ocalić łod zapomniynio.
s.ptaszyński 13.12.96

Do kamrata-Lyona [dok.gotowe]poz.132
--------------------------------------


Miołeś mi być kamratym
opokom,na kerej szukołech oparcio
i co.
nie wytrzymołeś ciśniynio życia
jak sie skończyły asfalty
a przyszeł czas na kocie łepy
jak cesta kero piynła sie pod kympka
nogle sie urwała stchórzyłeś
obrołeś bezpieczny spokój.

Zdradziyłeś chopeczku noszo sprawa
te przegodane wieczory
te zatopione w klubowych fotelach chwile
te jasne proste spojrzynia
to zbratanie zawarte w rocie milczynio.

Pamiyntej!
jak bydziesz bajtlom łozprawioł
o etosie lot swojej młodości
to finoł sprawy opowiydz milczyniym
to lepsze niż rozbiegane ślypia
gnane zawstydzyniym.

s.ptaszyński 14.1o.96
Ostatni Apel [dok.gotowe]poz.141
------------
Stojom na ostatnim apelu
w idyalnie równym glidzie
jenerał,śmieciorz,motyka i prawiczka po abrachamie


Teroz som pogodzyni nie czekajom
kery piyrwszy powiy dziyń dobry.

Oni som w świecie pożegnań
kamiynnie spokojni,milczyniym dobrzy.

Oni jak kożdy z nos nie chcom wlyść
w szarzyzna zapomniynio,proszom o zdrowaśka
mało kropelka wspomniynio.
s.ptaszyński 8.11.96




-----------------------------