Mary
----
Coś ostatnimi czasy
na chodzą mnie nocne mary
włażom mi pod pierzyna
wciongają mnie w swoje nory
a razym z marami przychodzom
wspomnien młodości tysionce
jak z piyknom młodom dziołszkom
leżeli my se na łonce.
Cóż musza Ci pedzieć Pon Boczku
żeś piyknie tyn świat wyrychtowoł
żeś obok trowy i kwiotków
take cudo jak baba zmajstrowoł
no se pomyślcie chłopy
pomyślcie kameraty
co by bez bab robiyły
te nasze chłopske charmaty.
s.ptaszyński
Rzykanie
--------
Cichy szmer deszczu na liściach jaworu
łechce moje uszy szeptym natury
za to,że to słysza-dziynkuja ci Panie.
W ledwo rysujoncym sie brzasku
budzi mnie koncert-klonskanie trelowanie
za to,że to słysza-dziynkuja ci Panie.
Dziwom sie w płomiyń kominka
uczestnicza w procesie polynio
i za to,że pozwolosz mi dostrzec koniec
wszechrzeczy dziynkuja ci Panie.
W zmynczonych oczach staruszki matki
dostrzegom obroz mojego przemijanio
i za to,że to dostrzegom dziynkuja ci Panie.
s.ptaszyński
Ślońskie Wołanie
----------------
Śłuchejcie Piastowie zaklynci
na wszystkich ślońskich cokołach
czas obudzić sie do czynu
gdy głos trombki woło.
Pomożcie nom ślońscy bracia
zamarli hań w przeszłości
stworzyć cudne ślońskie kraje
na miara Waszek wielkości.
Wzywom ksionżont spod Głogowa
Brzegu czy Opola
zew swobody i wolności
na cołki Ślońsk woło.
Tu na naszej ślońskej ziymi
kaj slońzoki żyjom
niech se rzondy sprawiedliwe
sami łodprawujom.
s.ptaszyński
Brak komentarzy:
Prześlij komentarz